Escòla Gaston Febus - Edicions RECLAMS
Promòver la lenga e la cultura de Gasconha
Aquesta revista de junh que’s centra suu pastoralisme. De segur, que son los meses de las amontanhadas. Qu’ei lo parat de brembà’s los mots deus pastors, quauques tèxtes suu tèma, e tanben, de tornar hèr un pauc d’istòria dinc a uei. Pr’amor, qu’ac cau díser, los pastors qu’acòrdan tradicion e modernitat.
Que poiretz descobrir un autor navèth, Danièl Lamaison e lo son libe de poesia, Aluenhaments, o hestejar los cincanta ans de cançon d’Eric Fraj.
Bona lectura!
Pèir Placerar
Qu’aubrii la frinèsta de la cosina. Lo dia que vienè a plaserinas suus malhs. Que harà bèth, ce’m digoi. Qu’aví mau dromit, sudat a chorrolhs. Totun, qu’aví saunejat ad era e qu’èri aconortat ; que sabí que los mens sauneis ne’m mentivan pas jamei.
Qu’èri a tirar los batants quan un vent escosent e’m tumè : la canicula que tornava com anonciat. Beròi, lo men can, qu’arrecotí tà la sala d’estar ; que m’espiè dab lo son espiar tostemps tendre. Que passèi los dits peu son doç pelatge, que’u bailèi lo cap. Que ronava com un gat.
Que’m dochèi, qu’esdejuèi e que m’assedoi tà léger Un roi sans divertissement qui aví deishat, la vèlha, suu canapè.
©2021 Reclams - Escòla Gaston Febus
