Escòla Gaston Febus - Edicions RECLAMS
Promòver la lenga e la cultura de Gasconha
En aqueste numèro de junh de 2020, que descobriratz la fin de la novèla de Joan-Luc Landi qui'vs conta la Carnavalada a Pau de 2027 - un pauc fantastica de vertat ! Poèmas d'autoras deus libes a viéner de Reclams Paraulas de Hemnas. Que poderatz tanben tornar legir l'Eugène Larròca dens la sua letra literària contra los hasans, Ca-ca-ra-ca. E a non pas mancar los sites internet de Domenja Lekuona.
PAULINA KAMAKINE
Poèma presentat dens Paraulas de Hemnas, tòme 1, seteme 2020
Ne me’n parlaràs pas jamei
de l’ombra a la baishada,
suus nostes paisatges desruits.
Non, ne me’n diseràs pas arren
d’aquera nèu qui va bèthlèu
amantar las nostas caras
e aucir lo vent.
Ne me’n parlaràs pas jamei,
d’aquera misèria ;
de las fins d’un ser
o d’ua vita
de çò que, tremolant,
s’aprèssa deu còr,
e arropa d’escur, la nueit.
Non, ne’m diseràs pas arren
Jamei, e que t’esperavi totun,
o n’esperavi sonque d’ua Paraula
l’espelida, lo silenci
com quauqu'un pòt esperar de la doléncia :
la darrèra minuta.
©2021 Reclams - Escòla Gaston Febus
