La Revista - Reclams

Legir la Revista n° 876 en linha

A cada pic l'estèra, çò ditz l'arrepoèr e acada sason un numéro de Reclams, çò completaram. E òc, qu'ei aqueste abòr qu'auratz lo parat de degustar los fruts de la garba d'estiu de la revista nosta. E que podetz escomptar que i a de qué aconortar aus mei dificiles. Poesia tostemps au rendetz-ve dab autors qui an costuma de collaborar com Aura Seguièr e Xavi Guttiérez Riu mes tanben aqueste còp Eric Astier shens desbrombar l'espugada literària d'un poèma per Maurici Romieu. Duas arreviradas de qualitat son au programa, l'ua d'un tèxte de Mario Vargas Llosa per Joaquim Blasco e la seguida d'ua adaptacion a la sauça bigordana d'ua hèita d'Arsèni Lupin per Matilda Cames. Ua vila qu'ei a l'aunor: Baiona. Quate tèxtes que la hican en scèna, un poèma es·hlamat de Jessyka Rojo (poesia enquèra) e un conte rimat de Gregòri Lonsan los dus viran (que s'i serem atenuts) autorn de las hèstas e tà completar, duas ficcions de Benoit Larradet e de Bastien Roche-Omon (un autor autant joen com prometor). E entà apréne'n tostemps mei la redaccion que v'aufreish la rubrica d'actualitats literàrias consacrada a Eva Cassagnet, Maurici Romieu que'ns destèca las subtilitats de la negacion en occitan, Andrèa Pèiraneras que'ns conta l'ahar d'Ercules a Nimes e Domenja Lekuona que contunha la visita de Salias organizada peu Topin de lenga entà'ns har percórrer los camins de la migracion qui devón a còps causir los salièrs.

E tot aquò, solide, en lo parlar causit peus autors.

ERA ARRESTACION D’ARSÈNI LUPIN

MAURICE LEBLANC

Adaptacion de Matilda Cames

Dusau partida de l'adaptacion bigordana per Matilda Cames, hèita en encastre d’un desfís de traduccion entaths traductors en formacion.

Un solet crit que’s hesó enténer ath demiei dera nosta amassada. Ua sola opinion qu’èra partatjada de totis eths passatgèrs, autandàvit¹ coma eth panatòri estó conegut: qu’èra Arsèni Lupin. E, de hèit, qu’èra plan era sua manièra complicada, misteriosa, de non pas concéber... E logica, totun, per’mor qu’èra de mau arrecelar era massa empachiva de qui aurén formada totas aqueras jòlhas atau amassadas, mès eth puishèu qu’èra d’autan mes arredusit dab petitas causòtas separadas eras uas deras autas: pèrlas, esmeraudas e safirs.

Pendent eth sopar, aquò que’s passè: ara dreta coma ara esquèrra de Rosèra, las duas plaças que demorèn vueitas. E eth quite ser, que’s sabó qu’èra estat convocat peth comandant.

Era sua arrestacion, qu’arrés non botèn en dobte, que causè gran solatjament sol. Fin finala, eth monde que podèn arrespirar. Aquera neit, eth monde que’s hesón aths petits jòcs. Que dancèn. Miss Nelly, sustot, que muishava un gòi capvirant de qui’m hesó véger que, quan eths aumenatges de Rosèra l’avossen hèit plaser ara debuta, ara non se’n brembava pas gaire. Era sua gràcia qu’acabè de’m conquesir. Ath entorn de miejaneit, ara clartat serena dera lua, que l’assegurèi deth men estacament dab ua emocion de qui no’u semblè pas desplàser.

Mès eth dia seguent, qu’aprenom totis, espantats, que, per manca de cargas sufisentas arrelhevadas contra d’eth, Rosèra qu’èra estat liberat.

Hilh d’un negociant considerable de Bordèu, qu’avè muishat papèrs completament en arrègla. De mes, eths sués bracis non presentavan pas nada traça de quauqua nafra.

La seguida en lo numéro 876 de la revista

1 autanlèu

La revista en linha

Legir la Revista n° 876 en linha

ERA ARRESTACION D’ARSÈNI LUPIN