Legir la Revista n° 878 en linha
♪ Lo primtemps qu'ei arribat ♫ , e dab lo temps de la vriuleta qu'espeleish tanben lo numéro 878 de la vòsta revista. Güeratz ua metafòra de bon hialar e com ei frutèca que la vam seguir a plaser. Que'ns hè gai de v'auherir los arrams beròi eslorits de las rubricas costumèras: Conéisher e compréner, Nòvas, Tintas, Mites e Actualitats, totas cargadas de borrolhs qui brotan e s'esparpalhan tà hornir ua flocada de tèxtes variats: ficcions dab dus contes: un breton, la seguida de Las Cronicas del soscantoral, arrevirada deu galhèc per Joaquim Blasco e l'aute, provençau, de Jaume Jaussaud sòbriament titolat conte; dus articles de reflexion un de Joan-Luc Landi qui compara dus hestaus estivencs e l'aute de Gregòri Lonsan sus un film brasilenc qui renvia a un mite hòrt conegut de Gasconha.
Com tostemps la poesia que tien ua plaça d'aunor dab autors com Escotarròbi, Xavi Gutiérrez Riu, Domenja Decamps, Eric Astié, Aure Seguièr e enfin Sèrgi Javaloyès qui liura un poèma elegiac introductiu a l'epopèa qui ei a escríver sus Bernadeta Sobirons. Qu'ei eth tanben qui a hicat en grafia classica duas poesias de Lop d'Estrem un joen felibre biarnés qui patí un triste hat.
E fin finala taus ahuecats de lecturas de tot ordi lo darrèr numéro de Reclams s'acaba sus cinc entervistas qui rebatan lo riquèr de l'actualitat literarària occitana dab Tresià Pambrun tà Poèmas de veire, Sèrgi Javaloyès qui a escriut un conte taus mainats: Lo viatge de l’auca, Joan Pau Ferré entà un recuelh de novèlas d'anticipacion: Deman passat, lo capredactor de L’ABC del Saber Jaume Jaussaud e Vicenç Claverie qui's prèsta a l'exercici de l'entertien per aver tradusit un àlbom de Tintin: Las jòias de la Castafiòra. A consumir shens moderacion.