Dens l’encastre deu hestenau Passa-Pòrts, Eth Ostau Comengés e las Edicions Reclams que perpausan un dissabte suu roman policièr a Sent Gaudenç lo 30 de març de 2024. Que permeterà d’encontrar autors, de batalar dab eths, de compréner las lors motivacions e la lor imaginacion.

Atau, qu’encontraratz Sèrgi Javaloyès lo dissabte maitin a 11 h. a la libreria L’indépendante (12, carrèra de l’independància) per ua presentacion deu darrèr libe (postum) d’Eric Gonzalès que partís en mai passat: Auròst entà ua escort.

Que poiratz devisar tot lo vrèspe dens las salas de relaish deu cinèma Le Régent (16, carrèra de l’independància) dab Joan-Miquèu Dordeins suu son Murtres en cadena, dab Joan-Loís Lavit suus sons romans deu comissari Magret e dab Christian Louis suus sons nombrós romans en francés inspirats de hèits istorics locaus.

 

Tad atirar l’atencion sus la lenga e l’istòria locau, que perpausam un escape game sus un scenari de Joan-Loís Lavit: Los escapitats de Sent Gaudenç. Un clinhet a l’escapitada de Gaudenç, lo pastoret que balhèc lo son nom a la vila. Lonh de l’istòria anciana, la novèla ligada au jòc que conta l’enquèsta deu comissari Magret tà resòlver un ahar drin banau e hòrt contaporanèu. E coma nos bremba l’autor: qui ten la lenga, teng la clau!