Maurici Romieu, capdau de l’associacion Escòla Gaston Febus Reclams edicions & revista, que recebó un chèc de 2 500 € de Ligams, entà ajudar a tornar a editar lo Diccionari deu Biarnés e Gascon modèrnes de Simin Palay.

Lo 26 de heurèr, Margalida Rambeau-Arnautou que morí; qu’anava fenir ueitanta cinc ans. 

Qu’estó capdau de l’Escòla Gaston Febus. Que hasè valer lo gascon e que s’i hasèva entà alandar las pòrtas, partatjar, escambiar, amassar.

Que poderatz legir un omenatge ad aquera dauna suus Reclams qui vienen, lo numèro 849.

Katy Bernard e Maria-Anna Châteaureynaud qu’organizan a la Maison de las Sciéncias de l'Òmi d'Aquitània de Peçac, ua jornada en aumenatge a Bernat Lesfargas, poèta, traductor, editor e defensor de l'occitan. Las conferéncias e los talhèrs que seràn seguits per ua lectura de tèxtes de l'autor.

Programa

Viral qu’ei lo darrèr libe de Sèrgi Javaloyès. Escriut en francés, que conta l’istòria de Danièl, espitalizat e confrontat a l’urgéncia de víver. Au gusmeth de la malaudia, que’s bremba de la soa joenessa com èra estudiant a Pau dens las annadas setanta, de la violéncia de las accions bascas, de las prumèras experiéncias amorosas… En aqueth libe, que i a quauquarren de personau, de viscut, qui parla tot dret au legidor.

Dens lo numèro 848 de Reclams, que trobaratz las prumèras paginas deu libe Viral, arreviradas per l’autor, libe aperat en gascon La frinèsta.