Libes joenessa

Las edicions Reclams qu'aubrissen aquesta annada ua linha editoriau Joenessa. Que perpausan libes entà tots los atges dab mèdias actuaus. Taus petitons, que s'agís d'un libe-vidèo illustrat, Paraulinas, tà los que ne vòlen pas legir tot un libe, ua BD, Pepper & Carrot, en gascon e en lengadocian e taus adolescents un libe de sciéncia ficcion, Rodeo preïstoric. 

Aquesta volontat que seguís la parucion en 2022 d'Ercules l'iniciat, un libe qui interessa los liceans e los adultes curiós de la significacion deus dotze trabalhs d'Ercules e de l'ensenhament grèc associat. En efèit, perqué tuar lo leon de Nemèa? Perqué la captura de Cerbèr, lo guardian deus in·hèrns, ei lo trabalh darrèr?

Los libes que son causits dab suenh. Atau Paraulinas d'Eva Cassagnet qu'ei un recuelh de poesias de qualitat. Bracs o longs, los poèmas que parlan de subjèctes d'interés peus mainats de 3 a 7 ans: las sasons, los animaus, lo som... Los dessenhs de l'autora que contribuissen a l'escaduda deu libe. De mes, la vidèo, associada mercés au QR còde, que permet aus mainats d'enténer e de tornar enténer la lenga. 

Aquesta BD qu'ei un trabalh collaboratiu, un webcomic hèit dab utís open-source e tradusit en 67 lengas coma l'anglés, lo magyar (parlar de Hongria) o lo kernewek (ua lenga enter lo galés e lo breton). Que podetz visitar lo site en clicar ací. Ei clar que lo dessenhaire, David Revoy, ei influenciat per las BD coma Mélusine o Léonard, peus jòcs vidèos e peus mangàs.

Fin finau, Aure Séguier qu'a escriut un tèxte dinamic e plen d'imaginacion que conta las aventuras d'ua liceana e d'un licean cargats de barrar ua halha espacio-temporau. Atau que nos mian a l'epòca deus dinosaures! Un libe a legir tot d’ua tirada e qui ei la debuta d'ua seria. Que sortirà au començament d'octobre de 2023 e que'u calerà seguir.