Setmana mondiau de Gasconha

Gasconha que vau plan ua hèsta, ça ditz lo Cercle gascon de negòcis. Alavetz, qu’avian la Setmana mondiau de Gasconha deu 22 au 29 de junh de 2024.

Tres ans a, un trentenat de personas que’s son assembladas en ua associacion d’enterprenedors tà valorizar los produits de noste. Lo president, Jean-Luc Lagrave, qu’ei lo creator deus vestits de la mèrca Adishatz. Ariane Daguin, creatora de D’Artagnan foods, qu’ei ua sòcia actiu aus Estats Units. David Lesbarreres, un aute sòci e president deu centre E. Leclerc de Sent Vincenç de Tiròssa que perpausa mots gascons dens lo son centre coma lo cornèr Lo cosinèr o lo Viste hèit, nhac & cafè. Etc.

La setmana deu 22 au 29 de junh, qu’invitan tots los Gascons a botar a la lutz la nosta cultura, los nostes espòrts, la nosta gastronomia, las nostas institucions e las nostas produccions.

Alavetz, las edicions Reclams que presentan la sua colleccion de guidas de torisme «Passejadas» tà hèr conéisher Gasconha aus visitaires. Que son guidas que parlan d’istòria, d’arquitectura de segur e tanben de legendas, de tradicions, de cosina, d’environament, de la lenga, en dus mots de tot çò que hè la nosta identitat. Aquesta setmana, que publican lo guida Lescar, capitale historique du Béarn. Maurici Romieu que'u presentatarà peu prumèr còp a Lescar lo 15 de julhet a 19h a la maison comuna.

Anne-Pierre Darrées