Luishon, un guida pas coma los autes

Las Edicions Reclams qu'an aviat ua colleccion navèra entà descobrir lo país noste, e que comencèn en 2023 per Luishon. Que's tracta de muishar çò que vesem, coma los monuments o las hèstas, e tanben de revelar causas mens conegudas coma las heitetas o la cultura. Lo libe qu'ei conhit d’informacions de tota mena entà enténer aqueth parçan. Non ei ni un libe sapient ni un libe toristic, mèslèu un libe entà los qu'an enveja de s’impregnar deu charme, de l'amna de la vila.

Per exemple, coneishetz los noms de las montanhas? Qué vòu díser la "Pala Barrada"? Sabetz díser "bon appétit" en luishonés? Lo libe que vos balha la solucion: Bona barra! E sabetz perqué las gents disen: abans l'epòca nosta, los vilatges èran ací haut?

Que podetz visitar la glèisa romanica de Sant Aventin o hèr lo torn de las villas deus princis de Monegue, de la familha d’Edmond Rostand o de Mata Hari. E tanben descobrir Tantugo, aqueth personatge mitic e aimable. Qu’ei lo parat de revisar l’estatut sociau de la hemna aus Pirenèus e de conéisher lo tractat deu Plan d’Arrem de 1513, totjorn en aplicacion.

Deu costat de las tradicions, sabetz que los Luishonés hèn dus halhars: a la sent Joan e a la sent Pèir? Coneishetz las especialitats culinàrias deu lòc? Voletz visitar las montanhas, descobrir la lor flòra, la lor fauna? O legir l’istòria de l’òme qui talhava arbes e de lo que'n plantava?

Qu’ei tot aquò que conta aqueth libre en quauquas paginas. De qué balhar enveja d'apregondir mes d’un aspècte!

Leà Dastarac