Gen
29

Editoriau 852

 

La navèra edicion deu Dictionnaire du Béarnais et du Gascon modernes de Simin Palay

 

Aqueste numèro especiau de la nosta revista que tempta de muishar quin las edicions deu Dictionnaire du Béarnais et du Gascon modernes, de Simin Palay entercalhèn los felibres de l’Escole Gastoû Febus, mes tanben lingüistas, poètas, escrivans de tota traca. Que i trobaratz donc articles de tot escantilh qui’vs permeteràn de miélher compréner çò qui estó lo tribalh de non pas créder de Simin Palay e tanben de la recepcion qu’avó lo Diccionari quan naishó.

 

Après la reedicion de 1995 deu Dictionnaire du Béarnais et Gascon Modernes de Simin Palay, las edicions deu C.N.R.S que deishèn de’u publicar. Lo Congrès Permanent de la Lenga Occitana (C.P.L.O.) que sollicitè l’editor uas quantas annadas adarron, dab la tòca de’u tornar publicar en coedicion dab las edicions Reclams de l’Escòla Gaston Febus (l’Escole Gastoû Febus, dont Palay estó capdau de 1923 dinc a la soa despartida, en 1965.

 

Lo C.N.R.S. que’n dé l’autorizacion aus coeditors. Los drettenents — Dauna Huguette Palay que’us representava — que n’acceptèn lo principi e que signèn un contracte d’edicion dab los coeditors. Tanlèu signat lo contracte, l’entin qu’estó aviat peu C.P.L.O. tà que podóssem véder a espelir la navèra edicion tà la fin de l’annada 2019.

 

L’entin, qu’ac sabèm, que seré complèxe e long. Que caló, de fèit, que sasíssem lo diccionari publicat en 1980 dab las annèxas, que’u corregíssem mantun còp. Lo vòste servitor que’s carguè deu prumèr tribalh (la pica e las prumèras correccions), en i integrant lo suplement de l’edicion de 1980, collectat per l’abat Sent Besard qui s’èra dejà encargat dab Palay de l’edicion de 1962, e Eric Gonzales, qui ei membre deu Conselh lingüistic deu CPLO, qu’estó encargat d’establir l’edicion navèra, tot en corregint lo francés e, quan s’escadè, lo gascon.

 

Atau, qu’avem lo gai de vs’anonciar que la navèra edicion deu Dictionnaire du Béarnais et Gascon Modernes de Simin Palay, dens la soa grafia originau, ei vaduda uns quants dias a. Qu’ei acompanhada per dus prefacis, lo prumèr d’Eric Gonzales qui tracta de la lenga e de la grafia hargada per Palay ; lo segond, deu vòste servidor e deu noste capdau, sus l’istòria d’aqueth màger obratge de referéncia, qui ei, qu’ac sabem tots, mei qu’un diccionari.

 

 

Connexion



-v2-