Oct
05

Editoriau

de Maurici Romieu Revista N° 843 / 2017

 

Au parat de l'amassada generau ordinària e extraordinària deu 1èr de julhet passat – entà las duas previstas lo 17 de junh, ne i avè pas avut lo quorum – com previst, quauques decisions qu'estón presas a perpaus de las modalitats d'adesion a l'associacion e d'abonament a la revista.

D'ara enlà, mantuas possibilitats que son auheridas :

adesion a l'associacion : 10 € ;

abonament a Reclams (version papèr) : 30 € ;

adesion e abonament a Reclams (version papèr) : 35 € ;

abonament a Reclams (version numerica) : 10 € ;

adesion e abonament a Reclams (version numerica) : 20 €. 

Peu moment, los abonaments a la version numerica que son minoritaris e ne sabem pas çò qui serà l'evolucion de la situacion dens las annadas a viéner. En aténder, que pensam que cau conservar las duas auhèrtas.

Las amassadas qu'estón tanben lo parat d'escambiar a barreja sus la situacion. Si, per escàs e calè redusir las activitats de l'associacion, – Diu que nse'n presèrve – la prioritat que seré balhada au mantien de la revista, pr'amor qu'ei un simbèu hòrt. D'ua auta part, quauques participants que pausèn la question deu contiengut ; sus aqueth punt la reflexion qu'ei aviada e au Conselh d'administracion previst peu mes de seteme, un punt que serà hèit e decisions que seràn presas sus las diferentas proposicions. Ne cau pas desbrombar que l'existéncia deu site Internet e'ns pòt perméter de perpausar autas causas tà anar de cap a ua diversitat mei grana deus contienuts e de trobar un espaci navèth d'expression qui la version papèr ne pòt pas auherir pr'amor de las soas constrentas. 

En aténder de'vs dar informacions mei precisas dens los Reclams de l'abòr, los responsables de la revista e de las publicacions que mercejan
tots los qui'us an ajudats : abonaments navèths, reabonaments, abonaments de sostien, messatges d'encoratjament…

Qu'avem la fe, las òbras que seguiràn ! 

 
 

Connexion