Jui
06

Bis repetita

de Maurici Romieu Revista N° 842 / 2017

 

1. LA REVISTA RECLAMS

 

Si lo nombre d’abonats e’s mantien, peu moment, a 110 (dont 78 abonats volontaris ; los autes que son membres de l’associacion E.G.F. Castèth de Mauvesin e las bibliotècas e mediatècas), que i a, totun, despuish mei de cinc ans, ua baisha regulara qui n’estó pas completament compensada per abonaments navèths.

Que cau considerar tanben la situacion de la lenga ; en despieit de l’aumentacion de l’auhèrta d’ensenhament de las escòlas laïcas Calandreta e de las seccions bilinguas de l’Educacion Nacionau, de totas las manifestacions publicas, de totas las accions associativas, nada reconeishença de l’occitan n’ei estada obtienguda : la plaça de la lenga dens la vita vitanta que se’n tròba mei anar mei shètra.

La darrèra generacion de locutors naturaus qu’ei sus desparéisher dab com consequéncia la rompedura de la transmission familiau e sociau.

Uei lo dia, los qui practican la lenga, qui la pòden léger o escríver que son mei anar mensh nombrós, çò qui vòu díser que lo nombre de legedors potenciaus deus libes e de las revistas escriuts en occitan que va – malaja ! – en baishar.

Hens ua tau situacion, quau pòt estar l’aviéner de la revista Reclams e de l’edicion de libes en occitan (gascon) non pas a tèrmi mejan mes a tèrmi pròche, en saber tanben que la plaça de la lectura dens la societat francesa e europèa actuau que baisha a continuar ? E’ns cau causir la solucion de l’edicion numerica — qui demora minoritària en França — tà har rampèu ad aquera baisha ? E’ns cau causir d’autas solucions ?

Aqueth punt de vista que pòt semblar pessimista ; n’ac pensi pas, qu’ei simplament realista.

 

2. L’EDICION

 

La baisha de las ventas durant la medisha tempsada (véder l’estudi realizat per E. Sabes e S.Javaloyès sus las ventas e los abonaments a la revista) qu’ei espectaculara ; duas excepcions totun : los libes qui profieitan d’ua promocion pr’amor la lor pareishuda qu’ei ligada a la creacion d’un espectacle eponime, d’ua manifestacion culturau qui an atraçat hèra de monde o de recensions dens los mèdias regionaus e nacionaus ; essais sus la lenga qui son estats publicats en edicion bilingua.

La publicacion bilingua que’m sembla d’estar ua faussa solucion, un remèdi momentanèu qui cela lo mau shens guarí’u. Ne cau pas saunejar : que sabem que la màger part deus legedors van causir — tad aquò qu’an tostemps rasons de las bonas — la version francesa e que n’anaràn pas espiar deu costat de la version occitana.

De mei, aquera solucion ne va pas reglar lo problèma màger : çò de la baisha de las ventas ; de segur dens un purmèr temps, la chifra de las ventas que pòt estar mei grana mes dab lo doble de paginas, lo còst globau que va aumentar : çò qui ganham d’un costat qu’ac perdem de l’aute ! ! !

Entà miélher har, la Comission Paritària de las Publicacions e Agéncias de Prensa (CPPAP) que’ns suprimí lo benefici d’ua tarifa preferenciau deu mandadís postau en 2016, per’mor que non publicavam pas 4 revistas a l’an com ac vòlen ; çò qui aumentè las cargas nostas de mei de 1000 euros.

E cau hornir que las subvencions publicas autrejadas peu CD64 e per la region (uei lo dia, Navèra Aquitània) n’an pas deishat de baishar despuish 5 ans ? Aqueths dus fenomèns apielats, baisha tendenciau deus abonaments e de las ventas de libes e baisha tendenciau de las subvencions publicas, qu’explican la progression deu noste deficit qui ei devienut estructurau e non conjonturau. Çò qui ns’obliga a pausar-nse questions cruciaus. 

 

3. QUESTIONS CRUCIAUS

 

E cau deishar de publicar libes papèr ? E cau ensajar la publicacion numerica suu site ? E cau meilèu consacrà’s unicament a la revista ?

Fin finala, que tornam tostemps au problèma basic suu quau n’avem pas nat mejan d’accion : l’abséncia de reconeishença de la lenga, l’abséncia totau de la lenga dens los mejans publics actuaus de comunicacion e dens la vita vitanta. Quin pòt foncionar o meilèu subervíver ua lenga qui n’a pas nada visibilitat en la societat ? Shens comptar dab la baisha tendenciau tanben deus lectors dens las navèras generacions d’ensenhaires.

La consequéncia de tot aquerò qu’ei l’existéncia d’un deficit financèr qui va aumentar durant las annadas per viéner e ua associacion ne pòt pas foncionar atau dab deficits estructuraus.

Los estauvis possibles que son estats hèits ; avóssem 500 abonats a la revista e ventas normaus de libes : ne i averé pas nat deficit. Tà har ua revista o un libe, pr’amor los membres deu CA n’an pas competéncias tecnicas, qu’èm dens l’obligacion de pagar professionaus ; per’mor que cau que los libes nostes sian beròis, que sian com los autes libes venuts per las librerias. Non podem dar a léger au monde libes lèds e de mau léger, com hasèn d’autes còps. Lo monde de l’edicion nacionau e internacionau qu’a cambiat en plen.

Lo tribalh qui hèm com benevòles : collècta deus tèxtes de publicar, relectura, correccions — e qu’i passam hèra de temps — ne pòrta pas nada ressorsa financèra a l’associacion, que permet sonque de limitar lo còst. E qu’ei pro.

De mei, com l’associacion ne dispausa pas de nat locau pròpi, que deu pagar lo loguèr deu lòc on ei enterpausada la resèrva de libes e de revistas.

Quin har autament ?

 

LO FONCIONAMENT DE L’ASSOCIACION

 

L’associacion que fonciona dab l’investiment, que deverí díser lo devoament o quitament lo “ sacerdòci ” de tres o quate membres deu Conselh d’Administracion. Que sèi que n’ei atau dens la màger part de las associacions culturaus, mes aqueth constat n’ei pas un gran solaç. Quan aqueth investiment e permet d’aver un foncionament normau, las cuentas de segur que semblan mei leugèras ; mes quan lo foncionament ei un copacap permanent, los mei ahuegats que s’en·hàstian e lo problèma qui’s pausa, en mei deu problèma financèr, qu’ei lo deu remplaçament deus gavidaires qui vòlen o deven deishar las lors responsabilitats, e donc, fin finala, lo de l’aviéner de l’associacion.

Qu’avem volut balhà’vse elements d’apreciacion abans de’vse demandar de pensar a la situacion e a çò qui caleré har eventuaument tà melhorar-la.

Entad aquò har que volom adiar ua Amassada Generau Extraordinària lo 22 de març passat. Malaja, non la podom pas mantiéner e que’nse caló anullar-la. Que la haram après las eleccions presidenciaus, haut o baish après lo 7 de mai qui arriba e que vs’assabentaram per corric o letra de la data, de l’òra. De tota faiçon, que’s harà a l’Institut Occitan Aquitània, Castèth d’Este, avienguda de la Pléiade – 64140 – Billère-Vilhèra. Tel. 05 59 13 06 40.

Que’vse tornam dar ací las decisions qui’ns calerà préner.

 

1°). DECISIONS DE PRÉNER A L’AG EXTRAORDINÀRIA :

1.1. Barèma navèth de l’adesion e de l’abonament :

- Adesion simpla a l’associacion : 10 euros

- Abonament simple a la revista Reclams : 30 euros

- Adesion a l’associacion + abonament a la revista : 35 euros

- Abonament numeric simple : 10 euros

- Adesion a l’associacion + abonament numeric : 20 euros

 

— JUSTIFICACIONS:

Aqueth navèth barèma qu’ei obligatòri tà poder demandar e obtiéner un n° de Comission paritària entà las publicacions : jornaus, revistas… Aqueth n° de “ Comission Paritària de las Publicacions e de las Agéncias de Premsa ” (CPPAP) que permet, que v’ac torni díser, de beneficiar d’ua tarifa especiau hèra baisha entau mandadís postau e donc de har economias.

– Sus un plan mei practic, que sabem que uns quants aderents de l’associacion ne son pas interessats per la revista ; com la soa tirada ei foncion deu nombre totau d’aderents e lo còst proporcionau a la tirada, que poderem estampar sonque lo nombre d’exemplars necessaris e atau har quauques economias mei.

1.2. L’acòrd de principi sus la redaccion de la convencion d’assisténcia mutuau prevista per l’article 3 deus estatuts de la Federacion de l’E.G.F.

 

2°). L’AVIÉNER DE LA REVISTA E DE LAS EDICIONS:

– Que’nse calerà estudiar amassa las solucions justas e aplicaderas qui permetaràn o pas de continuar a publicar obratges : e’ns calerà, per exemple, crear navèras colleccions mei adaptadas au “ mercat deu libe ” ?

– Quin har tà atraçar navèths abonats ? E’nse cau cambiar lo concèpte de la revista qui estó cambiat n’i a pas hèra ? Quaus solucions trobar qui permeteràn de har baishar e a la fin finala desparéisher lo deficit ?

 

Connexion