Actualitats

actualites

Set
09

Deishem la paraula a las hemnas

Paraulas de Hemnas coberta

Las hemnas que son raras dens la literatura d’òc desempuish l’epòca barroca. Totun, la lor preséncia que creish a la mieitat deu sègle XIXau. Uei, que s’exprimishen e que representan un tèrç de la produccion literària.

I a ua poesia femenina ? Qu’ei la question que mos avem pausat. Qu’avem vist un espiar, ua sensibilitat, ua inclinacion tau hons, tà la relacion a l’aute coma au mainat, au pair, a l’aimat, un pensar sus la hemna tanben. L'expression que pòt estar doça, trufandèra o violenta.

Lo libe, Paraulas de Hemnas, coordinat per ua joena poetessa, Paulina Kamakine, que presenta 36 autoras de totas las regions de lenga d'òc : Adriana ABELLO, Lucia ABELLO, Soreta ALLARD, Lou Petìt Ausèth, Marilena BELTRAMO, Silvia BERGER, Magalí BIZOT DARGENT, Benedicta BONNET, Nadina BORGÉS, Terèsa CANET, Estello CECCARINI, Cecila CHAPDUELH, Amy CROS, Danièla DAO ORMENA, Domenja DECAMPS, Francesca DUDÒNHON, Tòni ESCALA, Danièla ESTÈBE HOURSIANGOU, Mayo FEUGAS, Genevièva GALLEGO, Tizian  GALLIAN, Josí GUILHÒT, Caterina GIUSIANO, Lisa GRÒS, Nicòla LAPORTE, Aurelià LASSACA, Sara LAURENÇ ZURAWCZAK, Emiliana LAVIGNE, Olga MARTINO, Marineta MAZOYER, Brigita MIREMONT ORAZIO, Tresià PAMBRUN, Tiziana RAINA, Caterina RAMONDA, Liliana ZAND, ZINE.

Paulina qu’a pres lo temps de las conéisher, d’identificar un element hòrt qui caracteriza cadua, de causir quauques poèmas de cadua. 

Peu prumèr còp, que balhan la paraula a autoras contemporanèas amassadas en un sol libe. Qu’esperam que vos harà gai de descobrir tot aqueth riquèr. E n’ei pas acabat, pr’amor un tòme 2 que presentarà un trentenat d’autas autoras...

Clicatz ací : Bona lectura a totas e a tots.

 

Abr
27

lo Palay 2020

extrait palay— Alavetz? ce'ns demandan, aqueth navèth diccionari? Com ei? Qu'avetz cambiat?

E ben, qu'ei coma anonciat!

Lo contengut qu'ei lo contengut originau en grafia originau. Òc, la presentacion qu'a cambiat : mei aisit a legir, e los mots qui èran dens los dus suplements de la fin deu diccionari que son adara dens lo còrps deu tèxte. Atau medish, qu'ei mei luxuós.

Los prefacis deus autors que i son tostemps. E que i a dus prefacis de mei.

Per venciva, lo suplement auherit dens la version Colleccion que vs'estonarà. Que i trobaratz articles de tot escantilh qui’vs permeteràn d’enténer çò qui estó aqueth trabalh. De segur, que parla de l’ortografia gascona perpausada per Louis Rouch e retenguda per Simin Palay, de la grafia emplegada dens lo diccionari e de la cronica lingüistica de Jean Séguy. Que vs'explicarà la contribucion de Fernand Sarran. E que legiratz recensions e articles de premsa de l’epòca de la sortida deu diccionari.

Que veseratz que Miquèu de Camelat ne n'èra pas sancèrament satisfèit. De dòu har que lo Capdau, maugrat l’avís d’òmis sages com Lacasa, Laborda, etc, aja semiat los mots d’accents a tot borratroish. Vertat que vòu mercar la tonica, mes qu’a bèth díser, qu’ei lo sol a aver coma aquò cambiat la cara deus mots.

Puish Maurici Romieu que'vs liura lo son espiar : D’aver repassat aquesta edicion deu diccionari letra per letra, mot per mot, pagina per pagina, que m’a permetut d’entrar en l’organizacion intèrna de l’òbra.

Lavetz, n'atendiatz pas! Crompatz lo diccionari!  

 

 

Gen
24

Autors, a vosauts !

novelasQu’ei lo moment deus concors...

Lo grop CALAM qu’organiza lo concors de literatura de 2020. Que podetz presentar un tèxte abans lo 12 d’abriu, en ua de las categorias qui segueishen :

A – Prèmi de la vila d’Anglet per un conte o ua novèla en pròsa : 600€
B – Prèmi de Poesia de la vila de Baiona : 600€
C – Prèmi Pèir Rectoran de l’Academia Gascona Baiona Ador, reservat aus 15-30 ans : 150€
D – Prèmi Lo Congrès per ua òbra d’adultes en cors / talhèr de gascon : 150€
E – Prèmi de l’Espèr de la vila de Tarnòs, reservat aus dròlles de mensh de 15 ans

L’associacion de bibliotècas deu Lauragués, Le lecteur du Val, que perpausa lo son concors annau de novèlas. Que i a tanben cinc categorias : Adultes, Licèus, Collègis, Mainats, Occitan. Avís: que cau enviar lo son trabalh abans lo 6 de heurèr.

Dec
07

Presents tà Nadau 2019

E voletz auherir un libe d'un autor gascon entà Nadau?

Un gran classic tà letraherits? Belina de Camelat, qu'ei la poesia e l'emocion, qu'ei ua eroina pastora deus Pirenèus e ua familha. Bilingüe, qu'ei lo parat de descobrir aqueth gigant de la literatura gascona.  

Ua obra pregonda a la glòria de la GasconhaRoncesvals de Manciet, qu'ei la poesia, l'umanitat, l'espiritualitat e la noblessa deus pòbles gascon e basco au temps de la batalha de Roncesvals. Trilingüe (gascon, basco, francés) que darà au legidor ua navèra percepcion de la hèita.

Novèlas frescas, dinamicas tà gasconofònes gaujósManipòlis de Landi qu'ei ua lectura aisida, viva en ua bèra lenga accessibla. Sonque en gascon.

Un libe originau tà sedusir los classics e los liceans? LegirL'estranh de Camus qu'ei gostar en gascon un bèth tèxte, dejà arrevirat en seishanta ueit lengas, portat au cinèma o en musica.  

Oct
20

Clarissa Habouzit que lei Peirotet

coloradoAlbèrt Peirotet (1931-2009) que neishó a Aubertin, près de Pau. Après estudis a Bordèu, que demora aus Estats Units d'America. Qu'ensenha lo francés a l'universitat de Grand Forks (Dakota deu nòrd). Un còp tornat tà França, qu'ensenha l'anglés e l'occitan a l'universitat de Pau. Qu'escriu dens la revista Reclams e, tanben, que publica uns quants obratges enter los quaus lo prumèr ei Que l'aperavan Colorado, en 1989. Que s'ageish de cinc novèlas. L'accion que's debana au miei deu sègle XXau. Un vent de libertat que boha après la guèrra. Tots que son pertocats, los eròis e los personatges mei convencionaus. Que cau cercar la soa plaça e har cap a las pressions sociaus...

Clarissa Habouzit que'ns conta la soa lectura deu libe. Véser la video.

Connexion



-v2-