Jui
06

Lo Miralhet deu Net

de Domenja Lekuona Revue N° 842 / 2017

 

Miralh, miralhet e soi tostemps ua lenga ? 

E ben ma sòr, ma mair, ma hilha, ma bèra-amor [1] quan hèi la capihona hens « Lengas e Poders », blòg animat per Joan Pèire Cavaillé, que’n soi tota regaudida.

Qu’ei un « simple » blòg, deu seminari deu quite nom Lengas e Poders. Un lòc fisic e en medish temps, quauques setmanas apuish lo rendetz-ve mesadèr, virtuau, lòc e temps de reflexion transdisciplinària en occitan sus problematicas pertocant los ligams qui uneishen las lengas e los poders de tots ordis. Que i hèn cas tot especiaument a las lengas minoradas.

La persona mercés a la quau avem accès a d’aquesta pensada contemporanèa en la lenga nosta que s’apèra Joan Pèire Cavaillé. Vadut en 1959, mèste de conferéncia, qu’ei, despuish 1999, membre associat a l’EHESS (Ecole des Hautes Etudes en Sciences Sociales). Que tribalha au CRH (Centre de Recherches historiques). Qu’ei un coneishedor de l’istòria de la filosofia e de l’istòria intellectuau deus sègles XVIau e XVIIau, de l’istòria religiosa, sociau e politica deus sègles XVIau e XVIIau, de la literatura francesa, italiana, anglesa e neolatina deus quites sègles.

Chança tà la canalha, qu’ei l’iniciator, dab quauques autes (Joèla Ginestet, Patrick Sauzet deu departament d’occitan de l’universitat de Tolosa, Domenge Blanc (antropologia), Joan Sibille (lingüista), Michel Banniard EPHE, istoria), Eric Fraj, e plan segur lo monde de l’Ostal d’Occitania), de sedenças de discussion sus la lengas e los poders, d’abòrd a l’Universitat de Tolosa 2015-2016 e despuish la rentrada de 2016 a l’Ostal d’Occitania 11, arrua Malcosinat 31000 Tolosa. Partidari de l’universitat per la carrèra e de l’idea que tot cadun filosòfe, antropològue, sociolingüista o pas, que pòt quauquarren dens l’expression collectiva d’ua pensada sus la lenga occitana, que’s hè lo mèdia, dab lo blòg que tien (http://lengasepoders.canalblog.com/), de las sedenças de reflexion mesadèras que’s tienen dab monde barrejats dont pacientament e neureish.

Shens que d’occitan que i ei question d’Aramèu dab l’estudi Joan Sibille en març de 2017 (sedença n° 4) qui s’interèssa au Soreth : lenga en dangèr ? o de seishanta ans de sociolingüistica occitana a la periferia, quin aviéner per la disciplina dab James Còsta.

Malurosament lo blòg que publica las contribucions e pas tostemps las discussions qui’s trescolan. Esperem qu’agin los mejans de’us enregistrar dens l’aviéner. Que’s conceberé d’ac passar dens ua ràdio d’ensenhament qui caleré apitar o dens tots los sites internet qui posquiam. En tots los cas mei baish que publicam lo ligam suu flus deus comentaris sus las contribucions au quau e nse podem abonar.

Per viéner lo 22 de març – e malaja non i poderèi pas estar – Joan Pèire Cavaillé s’exprimirà suu Perqué l’antropologia autoctòna de Daniel Fabre demorèt sens avenir ? Reflexion sus la separacion en França entre patrimòni etnologic e patrimòni lingüistic.

L’illustracion que la sorteishi deu blòg « Lengas e poders » e que mercegi a Jean-Marc Simeonin de me n’aver dat l’autorizacion de publicacion a títol graciós.

 

miralhet.jpg

 

 

Illustracion onirica © Jean-Marc Simeonin, que bremba a pausa l’engenh d’ocupar l’espaci de Jheronimus Van Aken dit Geròni Bosch (sègle XVIau). Sus Occitanica – laBasa, aute site màger deu quau e calerà que relate Lo Miralhet, que disen : illustrator e gravaire despuish los ans 1980, Jean-Marc Simeonin collabòra a las edicions dau Chamin de Sent Jaume. Tanben qu’ei un plastician a part sancèra dab la produccion d’un ensemble de mustras individuaus com collectivas. Libes de gravaduras, d’aigas hòrtas narrativas, que perpausan figuras desbastidas, trencadas : mites, bèstias, òmes, sents sovent entorceligats... Gravaduras color o negre e blanc qu’aligan imatges e tèxtes, en un sol ensemble e l’occitan assortit, que da a las òbras lors títols e claus. Edicions Chamin de Sent Jaume, Royer, 87380 Meuzac.

 

 

Los ligams :

http://lengasepoders.canalblog.com/archives/2016/11/06/34531215.html

http://lengasepoders.canalblog.com/archives/2017/02/20/34959847.html

Per abonà’s a cada messatge postat : http://lengasepoders.canalblog.com/rss.xml

Per abonà’s a cada comentari postat : http://lengasepoders.canalblog.com/feeds/rss/comments/

e solide se voletz lo corric de Joan Pèire Cavaillé que me’u podetz demandar  Cette adresse email est protégée contre les robots des spammeurs, vous devez activer Javascript pour la voir.

 

 

1. Pèir Salles in La Sobirana Pagalhós

Connexion