Nov
16

Viatge interior

Tintas de Lionèl Labòrda Revue N° 822-823 / 2012
Gascon

E que m’endòli

ajaçat en l’arcalheit

qu’aledi de l’alep

de l’aram pravadís

hens l’arrèca frutèca

afaitada deu mau

de l’estafinhèr.

 

Per dehòra lo crit de la cavèca.

 

E que m’apotgi

sus l’embraca decap tà tu, decap tà qui ?

engorgossits los uelhs de l’òmi

peu desaguís, eschaquetat

de tant de lagremas que m’enclòti

empipassat de hanga

embroquishat, que soi perdut.

 

La crapautalha que hesteja.

 

E puish com l’esbarrit

environat per lo mesprètz

còr enclavat tot engüeishat

de l’escarni, de l’engana

escarronhat, arreverat

esglasiat per l’aviéner

que brami ma dolor.

 

Un ahoalh de corbaishs que responen.

 

A punta d’auba un auburi

aujami ? que m’arromèri

qu’ei un pomèr qui m’auhereish

uas quandas pomas arpastairas

arrodadas, m’arreviscòli

arrencura’m non voi pas mei

tot alebrit, que m’aplegui.

 

Sus la branca mei hauta ua coloma que s’alissa.