Oct
30

Editoriau

Editoriau de Maurici Romieu, president Revue N° 816-817 / 2010

Dens l’editoriau deu darrèr numèro, que parlèm de la situacion de las edicions e de la revista Reclams, ua situacion preocupanta. Abans de v’assabentar drin sus l’evolucion d’aquera situacion, que’vs volerem mercejar deu vòste sostien morau e financèr ; las cotisas qu’asseguran ua part importanta deu finançament de la revista e de las publicacions e que son la pròva deu vòste engatjament associatiu ; l’auta part deu finançament que vien de las collectivitats territoriaus (Conselh generau deus P.A., Conselh regionau d’Aquitània). L’ideau que seré de’s passar de las ajudas publicas ; uei lo dia, lo nombre deus abonats n’ac permet pas. Tad aquò, que caleré que doblèsse, çò qui, dens la situacion actuau de la lenga, ei drin utopic. E poderé cambiar aquera situacion d’ara endavant ?

Mercés a la volontat d’uns parlamentaris de dreta e d’esquèrra, un projècte de lei sus las lengas regionaus qu’èra suu punt d’estar depausat suu Burèu de l’Assemblada nacionau. Mes, au darrèr moment, que sembla que pelejas politicas sian a’n travar l’espelida. Lo projècte de lei estosse discutit a l’Assemblada, ne’ns podem pas empachar de pensar a las oposicions ahuegadas qui’s manifestèn au parat de las diferentas discutidas sus la supression de l’article 2 de la Constitucion e qui ne mancaràn pas de’s tornar manifestar si un projècte de lei sus las lengas minorizadas ei presentat. En ua tau situacion, e podem estar optimistas suu contiengut finau d’aquera lei e sus las condicions de la soa aplicacion ?

La question que’s pausa clarament : quin l’occitan e pòt continuar de víver dens las condicions actuaus : shens nada reconeishença oficiau, shens nada plaça dens l’espaci public o suus mejans modèrnes de comunicacion ? Lo tribalh de tots los qui combatejan tot dia (personas, associacions…), tà cambiar aquera situacion, per tan consequent que sia, ne sufeish pas mei per’mor la practica de la lenga que continua de baishar. Adara qu’ei au poder politic de har lo son tribalh legislatiu ; que i a urgéncia !

Tornem a la nosta associacion ! La situacion financèra que comença de’s regularizar mercés a un esfòrç obtiengut de la part deu noste partenari In 8, a l’ajuda preciosa de l’Escòla Gaston Febus–Castèth de Mauvezin qui a pres en carga lo còst deu darrèr numèro de Reclams, enfin a l’ajuda grana deu Conselh regionau d’Aquitània qui ei estada mantienuda. Las negociacions miadas dab lo Conselh generau deus Pirenèus Atlantics qu’an permetut, fin finala, d’obtiéner ua subvencion de 4000€, com en 2009. Que sian tots mercejats !

Quan lo cabinet comptable aja passat los comptes de 2010 (qu’ei sus acabar lo son tribalh), que poderam har un punt mei precís sus la situacion financèra, dab l’estat deus abonaments e de las ventas de libes. D’après las chifras provisòrias qui avem, lo nombre deus abonats que’s mantieneré a haut o baish 160 (que cau notar totun un nombre mei important d’abonats joens). Actuaument, ua de las dificultats màgers qu’ei de crubar tots los abonaments ; vertat que los uns e los autes ne pensam pas tostemps a pagar totas las nostas cotisas o los nostes abonaments, quan comença ua annada navèra per’mor, sovent, qu’èm aderents de mantuas associacions e abonats a mantuas revistas o jornaus. Tà evitar los desbrombs, que vam hicar en plaça pro viste, un sistèma de relanç individualizat e sistematic, com ac hèn totas las autas revistas ; qu’ei un procediment normau.

Lo 25 de mai de 2010, los membres deu Burèu deus Reclams qu’encontrèn Mathilde Rimaud, de l’ECLA (Agence Régionale Aquitaine pour l’Écrit, le Cinéma, le Livre et l’Audio-visuel) e Jérémie Obispo (CR d’Aquitània), tà analisar lo foncionament de l’Associacion e ensajar de compréner los problèmas qui encontra. Mathilde Rimaud que pensa que i a drin de flaquèr dens lo noste foncionament au nivèu de la difusion e de la promocion deus libes qui publicam.

La difusion

Actuaument, los difusaires ne hèn pas l’esfòrç de promòver los libes editats per l’Associacion, pr’amor l’Associacion ne’us demanda pas nat rendut-compte precís deu tribalh de difusion. Que caleré que i avosse, de la nosta part, un dialòg mei regular dab los difusaires :

– tà’us demandar un seguit precís de las ventas : los autors e los libes qui’s venen, los libraris qui an ventas de las bonas, per exemple ;

– tà’us presentar sistematicament las publicacions navèras ;

– tà entertiéner ligams mei estrets dab los libraris qui s’investeishen dens la venta deus libes.

La promocion

Que caleré que la promocion deus libes estosse mei sistematica :

– soscripcions generalizadas : butletins de soscripcion dens Reclams e suu site Internet…

– publicitats dens la premsa, intervistas deus autors ;

– presentacions publicas deus libes dab signaturas peus autors…

Tà har brac, segon Mathilde Rimaud, lo flaquèr de l’Associacion qu’ei sustot au nivèu de la comercialisacion : n’avem pas lo reflèxe comerciau. D’aquerò, que n’èm tots conscients mes aqueth tribalh que demanda de la part de l’Associacion un investiment en temps qui tots los membres deu Burèu o deu CA ne pòden pas assumir. Aquera question que serà a l’ordi deu dia deu CA qui arriba.

Lo programa editoriau de 2010 qu’ei per ua part realizat ; un deus dus libes qui èran en soscripcion, Sorrom Borrom, lo saunei deu Gave, qu’ei dejà pareishut e l’aute Ulisse au flume, que deveré sortir pro viste : tad aquò, qu’atendem la subvencion regionau qui non deveré trigar. Segon l’estat de las finanças, lo CA de deceme qu’establirà lo programa editoriau de 2011.

Enfin, la demanda qui èra estada hèita a la Commission paritaire des publications et agences de presse de ns’atribuir un certificat d’inscripcion qu’ei estada regetada ; dab l’ajuda d’Eric Rey-Bèthvéder, l’Associacion qu’a aviat un recors au près deu Tribunau Administratiu de París qui ei sol competent dens aqueth ahar. Adara, que cau aténder la soa decision. Aqueth certificat d’inscripcion, que’ns permeteré d’obtiéner una tarifa redusida peus mandadís postaus e donc d’estauviar moneda.

Tà redusir lo còst deus mandadís e tà aleugerir lo tribalh de la redaccion, que vam tanben estudiar la possibilitat de passar a tres numèros per an. Mes aquerò que demanda reflexion. Com ac disèn dens lo darrèr editoriau, tot ne’s poderà pas har en quauques mes ; totun, dab la volontat deus gavidaires e lo vòste sostien, l’Associacion que continuarà de har cap.